Donostiako Orfeoiak amaiera emango dio hilabete bizi bati Urmugaren Urtanta jaialdiko bi kontzerturekin. Lehenengoa Hondarribiko Arma Plazan izango da, uztailaren 22an, astelehenean, 22:30ean. Sarrera doakoa izango da. Egun bat geroago, uztailaren 23an, 20:00etan, abesbatza Arantzazuko Santutegian arituko da. Bigarren ikuskizun honetarako sarrerak urmuga.eus webgunearen bidez lor daitezke.
Miguel Ceberio izango da bi kontzertuen zuzendaria, eta Et Incarnatus Orkestrak parte hartuko du. Donostiako Orfeoiarekin batera Maika Etxekoparrek abestuko du eta txistuarekin Iñaki Palacios arituko da. Abestien artean, Baga, Biga, Higa (Mikel Laboa), Itzaltzuko Bardoa (Benito Lertxundi) eta Gure Hitzak (Mikel Laboa) nabarmentzen dira.
Urmugaren Urtanta itsasoa, mendia eta musika oinarri dituen jaialdia da. Ekitaldia Nestor Basterretxea eskultore eta margolariaren omenez egingo da, 2024an bere jaiotzaren mendeurrena betetzen baita.
